Radio Charrando

Quiest@s amig@s, tos presentamos a nueba programazión d'o mes d'abiento en RadioCharrando.com. Tos remeramos que tenemos as puertas pataleras a la buestra colaborazión y as buestras sucherenzias.

Aprofeitamos ta informar-tos de que o prosimo chuebes 7, en o programa "Trabalenguas" de Radio 5 Todo Noticias, s'emitirá ta toda España una entrebista a o secretario de l'Academia de l'Aragonés, Fernando Sánchez. L'orario d'emisión ye a las 11:05 (u a las 12:05 pende d'a programazión) y se torna a emitir entre as 21:45 y as 22:00. Tamién tornará a charrar en un espezial sobre a nabidá que s'emitirá o diya 4 de chinero de 2007 (mismo orario). "Trabalenguas" ye un programa de RNE dedicau a las luengas de l'estau, an que dica agora només se charraba d'o catalán, o basco y o gallego, con istos programas se empezipia a dar presenzia a l'aragonés y a l'asturiano.


Mosica: "Renaxer y Pilar Garzón"
Tos ufrimos una grabazión de barias canzions en Aragonés d'o conzierto "I Encuentro de la Canción Aragonesa" que se ba fer en o Teatro Principal de Zaragoza en o mes de nobiembre de l'añada 1973, an que ban cantar "Renaxer" (con letras de Francho Nagore) y Pilar Garzón (con letras d'Anchel Conte). (21 min)
Agradexemos a Guillermo Laseca la suya colaborazión ta fer posible a espardidura d'iste documento istorico.

IV Leturas en Aragonés
O pasau 25 de nobiembre se zelebró una nueba edizión d'as Leturas en Aragonés que organiza o Ligallo de Fablans de l'Aragonés. Como resumen, tos ufrimos as interbenzions de Juan José Vázquez (Bizeconsellero d'Educazión d'a DGA), Felipe Pétriz (Rector d'a Universidad de Zaragoza), Ramón Tejedor (PSOE), Miguel Martínez Tomey, Chulia Ara, Adriana Vaquero (Radio Nacional), Chusé Aragüés y Mª Pilar Benítez. (33 min)

Mosica: "Corro d'es bailes de San Chuan de Plan"
Tos ufrimos una grabazión de canzions tradizionals chistabinas que acompañan a os danzes que interpreta el Corro d'es Bailes de San Chuan de Plan (43 min)

Mosica: "Prau"
Canzions d'o suyo disco "En o rafe d'a fuxaina" tituladas: "Ya ye prau", "Pueblo" y "Baxo el sol" (13 min.)

Podcast "Purnas en o zierzo"
Purnas en o zierzo ye un nuebo podcast (y un blog) empentau por Chorche Romance, an que se pueden sentir en aragonés notizias y opinions sobre l'autualidá de cada semana. Tos ofrexemos o programa penchau o 12 de nobiembre. (11 min)
Más info: http://purnaspodcast.blogia.com/

Patrimonio lingüistico de l'Alta Zaragoza
Banda sonora d'iste documental an que s'amostra l'aragonés de bellas localidaz d'a probinzia de Zaragoza, como Murillo y Santolaria de Galligo. (33 min)
Guión y direczión: Eugenio Monesma; Asesoría lingüistica: Fernando Romanos; Produze: Pyrene.

II Congreso de l'Aragonés
O II Congreso de l'Aragonés se ba zelebrar os pasaus 13, 14 y 15 de chulio en Zaragoza y Uesca. Tos ufrimos a ponenzia en Gascón de David Grosclaude, presidén de l'Institut d'Estudis Occitans, titulada "La situacion l'occitan dins los mijans de comunicacion". (1 ora 3 min)


Memorias,
www.RadioCharrando.com
www.Charrando.com
www.CharrandoTB.com


--

Manifiesto por la Lengua Aragonesa
www.laragones.com
FIRMA AQUÍ