Comunicado de Refús de o diya de as FFAA

TIERRA ARAGONESA RECLAMA O REFÚS ZIUDADÁN T´A INSTALAZIÓN D´A BASE D´A OTAN EN ZARAGOZA EN O DIYA D´AS FUERZAS ARMADAS ESPAÑOLAS.

Igualmen, considera anacrónico e insostenible ta Aragón, o contino alto grau de melitarizazión d' o suyo territorio. Iste feito, mos priba y mos determina, o plen desembolique economico y sozial d' o nuestro País. Dende Tierra Aragonesa desiximos o desmantelamien de toz os tarabidaus melitars en tot o territorio Aragonés.


Zaragoza 28 de mayo de 2008

Un 40% d' a superfizie d'o monezipio de Zaragoza, (un total de 33.839 etarias en un perimetro superior a 100 quilometros) y un 2% d' a superfizie total de Aragón son cutianamen ocupatas por o exerzito español, más de 20.000 soldaus, ocupan alredor de 200 diyas, alto baxo, á l´añada o cambo melitar y de maniobras de San Gregorio, en o monezipio de Zaragoza, Entre atras instalazións e tarabidaus, l' aeropuerto melitar, o Cambo de tiro d´ As Bardenas Reyals y o Polborín de Cadrete, continan estabiyendo una menaza por adibidura ta os ziudadáns Aragoneses.

L' aeropuerto zebil de Zaragoza, teunicamen un d' os millors d'o estau español, en tien limitau o suyo emplego por truxar con o exerzito lo suyo uso. Un aeropuerto como lo de Zaragoza, situato en bel puesto prebilexiato estratégicamen t´as comunicazións, serba un asabelo de importan motor mercantil t´a economía de nusatros y t´o desembolique d´o que se ha beniu clamando " o corredor economico d'o Ebro ", exe estratexico alazetal de tot o desembolique logistico y empresarial, que en iste inte y en un esdebenidero aprezisará Aragón.

Enguan bella cosa de 500.000 biacheros tramian ta l´añada por l' aeropuerto de Zaragoza, zifra muito inferior t´os más de 52.000.000 biacheros que tramioron por l' aeropuerto de Madrid, u los 32.000.000 de Barzelona. L' aeropuerto de Zaragoza, plenamen emplegato ta uso zebil, serbirba ta esconchestionar istos dos granizos aeropuertos. O incremento de biacheros por Zaragoza, poderba multiplicarse d' ista traza por bente, bi abendo un impauto dreito sobre as autibidaz comerzials y economicas de Zaragoza y Aragón.
A desinnazión de Zaragoza como base d' a OTAN ta aloxar t´o "eurofighter ", embrecarba antimás de fer d' a ziudá un claro oxetibo melitar y d' atentaus terroristas, que o emplego zebil y comerzial de Zaragoza nunca puedan arribar a desembolicar-se de raso y d' a traza que amenistamos toz os Aragoneses, condenando t´o territorio de nusatros a una endémica ocupanzia melitar, no deseyable; Tierra Aragonesa leba tiempo bindicando y reclamando a transferenzia de competenzias t´o Gubierno de Aragón, de toz os aeropuertos Aragoneses. Solenco a nusatros mos corresponde dezidir como cal que desembolicar y chestionar os nuestros Aeropuertos y tarabidaus.
A resta d' as instalazións melitars, no ´n tienen en l' autualidá no denguna autibidá produtiba. Istas poderban dedicar-se á autibidaz agricolas, ganaderas, produzión d' enerxías alternatibas ( parques eólicos y granxas solars ), u planes t´a construzión de bibiendas protexitas sin percusión d'o pre d'o sulero sobre o pre remate d' a bibienda, en as amplarias de San Gregorio amanaus t´a ziudá de Zaragoza.
Alabez os cambos de Tiro, se aposientan sobre una redolada artigosa d' asabelo d´ importán intrés ecoloxico. Muita parti d' a suya superfizie deberba d' estar declarada espazio protexiu como parque natural.
Por todas istas ragons os ombres y mullers de Tierra Aragonesa, demandamos o refús ziudadán t´a melitarizazión d´ Aragón, y desiximos á los nuestros responsables puliticos d'o Conzello de Zaragoza y d'o Gubierno de Aragón, que autuen contra l´estacha d' as instalazións melitars autuals y o asentamien d' a base d' a OTAN en Zaragoza, asinas como, esplanicar o refús t´a zelebrazión d'o diya d' as fuerzas armadas en a nuestra ziudá.

Más informazión en: